Nakakarma na si Gloria Arroyo
Ni Ellen Tordesillas
March 25, 2010
Ang balita kung sino-sino na raw ang kumaka-usap kay Philippine National Police Chief Jesus Versoza na mag-resign para mailagay na ni Gloria Arroyo bilang PNP Chief si NCR Chief Roberto Rosales.
Kinausap na siya ni Local Governments Secretary Ronaldo Puno. Pati na raw ang anak ni Gloria Arroyo na si Mikey, congressman ng Pampanga (2nd district) ay kuma-usap na rin kay Versoza.
Sana hindi magpa-pressure si Versoza dahil Disyembre 2010 pa siya dapat mag-retire.
Si Rosales ay kasama sa Class ‘78 ng Philippine Military Academy na honorary member si Arroyo.
Galit kasi si Arroyo kay Versoza. Hindi dumalo si Arroyo sa graduation ceremonies ng Philippine National Police Academy noong Marso 18 sa Camp Castañeda, Silang Cavite. Sa anibersaryo naman ng Philippine Army noong Lunes,binati niya ang lahat na mga matataas na opisyal maliban kay Versoza.
Ano ba ang problema ni Gloria Arroyo kay Versoza?
Galit siya dahil sinabi ni Versoza na hindi niya susuportahan si Armed Forces Chief Delfin Bangit kung sakaling ipilit niyang panatilihin si Gloria Arroyo sa kanyang inagaw na pwesto sa Malacañang lampas ng Hunyo 30, 2010.
Sabi ni Versoza, ilegal yun dahil ayun sa Constitution, dapat may bago tayong presidente pagdating ng Hunyo 30.
Masama ba ang sinabi ng PNP chief na hindi siya susunod sa illegal na order? Ibig sabihin noon talagang gagawa siya ng ilegal na hakbang para manatili siya kapangyarihan lampas ng Hunyo 30.
Kung sabagay, hindi nakakapagtaka ang mga ilegal na Gawain ni Arroyo. Ang pag-upo lang niya sa pagka-presidente noong Enero 2001 ay ilegal na. Hindi naman bakante ang pagka-presidente, inagaw niya kay Pangulong Joseph Estrada na binoto ng sambayanan. Mula non, kaliwa’t kanan na ang paglabag sa Constitution ang ginawa niya para lang manatili sakanyang ninakaw na pwesto.
Noong 2004 na eleksyun, nandaya siya kasabwat ang Comelec. Ngayon mukhang may niluluto na naman siya para hindi siya maalis sa kapangyarihan. Siyempre ilegal at dapat hawak niya lahat lalo pa ang military at pulis.
Akala niya hawak na niya ang military sa kanyang pagtalaga kay Lt. Gen. Delfin Bangit bilang AFP chief. Kaya siguro siya inis na pumapalag si Versoza.
Nakapagtaka itong si Versoza dahil akala ko, bata siya ni Mike Arroyo. Ngunit mukhang may panindigan at gusto niyang alalahanin siya ng taumbayan na kagalang-galang.
May isinulat ako dati nang balak pa nina Arroyo na isulong ang charter change. Si Lt. Gen. Alexander Yano pa noon ang AFP chief of staff. Kinausap raw sila ng isang taong malapit kay Mike Arroyo at tinanong kung maasahan sila na protektahan ang interes nila kung sakaling magkagulo.
Ang sabi raw ni Yano, hindi raw magbabaril ang mga sundalo sa mga sambayanan na magpu-protesta sa charter change. Sabi rin daw ni Versoza, “Ganun din po ang mga pulis. Hanggang water cannon lang sila.”
Kaya hindi na ipinilit ang charter change na sana ay magiging daan upang manatili si Arroyo sa Malacañang bilang prime minister lampas ng Hunyo 2010. Kaya nag-iisip pa sila ng ibang paraan. Sigurado ilegal.
Nakakatuwa. Mukhang kinakarma na si Arroyo dahil kaya niya pinili si Versoza kaysa kay dating PNP Deputy Director General Geary Barias, na nagpasikat sa Manila Pen na insidente sa mga Magdalo noong Nobiembre 2008, dahil Disyembre 2010 pa ang retirement.
Si Barias kasi Pebrero 26 nag-retire. Isip ni Arroyo at ng mga taong nakapaligid sa kanya, kapag mag-appoint siya ng bagong PNP ilang buwan lang bago siya bumaba, ang loyalty nun sa bagong presidente. Hindi katulad kay Versoza na matagal na ang kanilang pinagsamahan, sigurado siya sa kanyang loyalty sa kanya.
Paano ngayon yan na mukhang loyal sa Constitution at sa sambayanang Pilipino itong si Versoza. Nakakarma na si Arroyo.
Sana manatiling matibay si Versoza para sa katotohanan.